„Wenn weelschen du fer de neie Kittelberger? Doch de Beschtel?“

„Ah, denn konnscht doch net weehle, des is doch en Leerer. Unn der is doch schunn Birgermeeschder vun Wachrem. Unn zweemohl Birgermeeschder, des geht jo gar net. Unn die hamm doch gsacht, dass mer do verwalde kenne muss, des is awwer kenner wo verwalde kann, weils ewe än Leerer is. Unn der is mir sowieso uhoimlich, der werd vunn Waalkompf zu Wahlkompf jinger, zuminneschd uff de Plagaade!“

„Also weelscht donn doch die onner? Die Stegmonn?“

„Ah, die konnscht doch net weehle, die is kännie vun do. Des is ä zugezoginie. Unn donn noch vun hinnedrause, so ä Schlabbefliggerin. Oah, her mer bloos uff. Die konn zwar verwalde, awwer obb des als Birgermeeschderin longe duud? Isch wees net, do muschd doch a was vermiddle kenne. Fascht so wien Leerer! Unn die is mir sowieso uhoimlich, ich glaab die will Brahliene verkaafe odda Mussig mache, zuminneschd uff de Plagaade! Unn in de Zeidung wees die nedd, wie alld se is, die macht sisch ellder.“

„Also weelscht donn doch die gonz onner? Die Blaul!“

„Ah, die konnscht doch net weehle, die wees jo sellwer net warum! Die konn a bissel verwalde unn is vun do, awwer des hoscht doch ah gelese, die wees eschd net, warum die Birgermeeschderin werre will. Des hot se demm Schurlanist net vermiddle kenne! Unn die is mir sowieso uhoimlich, wege dem Noome uff de Plagaade. Do geed doch in Gennem die Poschd abb“

„Uoh her mer wirglisch uff, is des kombliziert. Isch glaab isch muss des werfle, awwer erschd dringk isch än Schorrle, odda zweeh! Des werds donn schunn rischde!“

Advertisements